شعری از استاد قابل نژادسردرودی

سعی ائله تا اولاسان یاخشی بیر انسان ، اوغلوم 

جنّت اولسون سنه بو دنیادا هر يان، اوغلوم 

اوتو- دور، صحبت ائله همه شه عاقللريله 

دوره وه قويما گله جاهل و نادان، اوغلوم 

دوشمنین ده چؤره يین کسمه مقامین اولسا 

هئچ کسین حالینی سن ائتمه پريشان، اوغلوم 

مظلوما رحم ائله، ظالملره میدان وئرمه 

قويما ظالم مینه آت، ائیله يه جولان، اوغلوم

 سايه سال، کؤلگه وه گلسین هامی، راحت اولسون 

سفره آچ، قوی هامی گلسین، يئسین احسان، اوغلوم 

برکه دوشسن، دؤزومون اولسون، ايتیرمه اؤزووو

 قالمايیب همه شه بیر حالده دوران، اوغلوم

 ايشله، فکريله قازان، اهل- عیالی راحت ائله

 اول ائو اهلیدی، اوندان سورا مهمان، اوغلوم

 دائم اخلاقینی خوش ائیله، ائشیکده، ائوده 

ائیله مه اهل و عیاله ائوی زندان، اوغلوم 

عبوس اولما، دئ- دانیش، گول ائو ايچینده مخصوص

 تا اؤلونجه ائله مه بیر کسی گريان، اوغلوم

 خوش صفاتیله بزه سینه نی، عارفلر تک 

ظاهر و باطنیوی ائیله گولوستان، اوغلوم

 فکری، گفتارينی، کردارينیدا دوز ائیله هر گون

 اؤز ايشلرينه وئر سر و سامان، اوغلوم 

دوز دانیش، قولووا دور، بیر ده امانتدار اول 

اوخوما اهل ريالار کیمی قرآن، اوغلوم 

آزاد اول، هئچ کیمه تقلید و تعصبّ ائتمه

 دانش و عقلی ائله هر زادا میزان، اوغلوم

 گئت حقیقت دالیجا، اهل خرافات اولما 

علمیله ائتمک اولار دردلره درمان، اوغلوم

 نار و جنت قورولوبدور اؤزووون سینه نده 

سن اؤزونسن همی رحمان، همی شیطان، اوغلوم 

پولووو ساخلا، قورو، خرج ائله مه بیهوده يئره

 يوخسول اولسون يئتیشر عقلینه نقصان، اوغلوم

 آبرو، صحت و مال، عهد جوانلیقدا قازان 

وئرمه الدن بولارين هئچ بیرين ارزان، اوغلوم

 ساخلاما کینه، عداوت ائلهمه هئچ کسیله 

مهربان اول دئنه جان- جان، دئمه قان- قان، اوغلوم 

حسد و بخل، تیکان کوللاری دير، قويما بیته 

پرورش وئر اوره يینده گول و ريحان، اوغلوم

 دنیا بیر فیلمیدی، بو فیلمین آدی چرخ و فلک 

سن باهار اول بو فیلیمده، نه زمستان، اوغلوم

 قويما قیسقینجا بیرين، هئچ کسی رسوا ائلهمه 

سخت توتما، اولا تا ايشلرين آسان، اوغلوم 

عیبین اؤرت اؤزگه نین، اؤز عیبینی اصلاح ائیله

 سرّين آچما بیرینین ائتمه هراسان اوغلوم 

تورکو ديلدن ده گؤزل ديل، اوره يین نغمه سیدير

 بیردی فارس و عرب و عبری و ترکان، اوغلوم

 کره ی خاك ائويمیزدير، هامی بیر عائله يیک

 نه کی تبريز و عجبشیردی زنجان، اوغلوم

 گؤتور ديوارلاری، همنوع لری بیر جان گؤر

 دنیادير مدّنظر، نه آذربايجان، اوغلوم 

هر نه واعظ دئیه، آلدانما، اينانما، اويما 

جنسینی تبلیغ ائلر صاحب دکّان، اوغلوم

 يوخلاما، يوخلايان انسانلاریدا قويما ياتا

 باشینا قويما کئچه بؤرکله يورغان، اوغلوم 

گون بو ساعت دئییلی هر نه بیلیرسن ائده سن 

 دوو دوشنده الیوه ائیله مه طغیان، اوغلوم 

دده ياتدی، اون اوچون گئتدی جوانلار الدن 

 قورد قويونلاری يئمز ياتماسا چوپان، اوغلوم

 يیخدی اخلاقین ائوين، قاپیچی چیرپدی قاپیسین

 در نه لازیمدير اگر اولماسا دربان، اوغلوم 

حقیّ، حق صاحبینه وئر، حقّی دئمکدن قورخما 

هئچ کسین حقیّنی سن ائیلهمه کتمان اوغلوم 

چونکو اوستاد مبیّن منیم اوستاديمدير

 شعرلريمده اودو کی واردی منیم جان، اوغلوم

 قابل اول، ساخلا بو قابل نژادين حرمتینی

 تا بونون تک ائده سن عمرونو پايان اوغلوم